Promovido polos grupos de investigación dx5, da Facultade de Belas Artes, e AF4, da Escola de Enxeñaría Forestal, Art at the Edge of Nature é un ciclo itinerante de encontros científicos centrados nas conexións entre arte, natureza e ciencia, que nestes días desenvolve a súa cuarta edición na Universidad Complutense de Madrid. O espazo La Trasera da Facultade de Belas Artes da UCM é a sede desta nova edición dun evento centrado en afondar, “desde unha perspectiva interdisciplinar”, nas relacións “entre prácticas artísticas, investigación científica e pensamento ecolóxico contemporáneo”, sinalan desde a súa organización.

Coordinado pola investigadora Antía Iglesias, xunto coa profesora de Belas Artes Ana Soler, directora do grupo dx5 (digital & grahpic art research) e a directora da EE Forestal, Ángeles Cancela, o encontro que nestas dúas xornadas se desenvolve en Madrid conta tamén co apoio do Campus Crea, a través da convocatoria de axudas á organización de congresos, promovida co financiamento da Deputación de Pontevedra. Nela, máis dunha vintena de artistas, investigadoras e investigadores protagonizan as conferencias e mesas de debate dos catro eixes temáticos nos que se estrutura esta edición, que leva por título Responsabilidades y conciencias biocreativas. Á fronte deste encontro sitúase un comité organizador integrado polas investigadoras da UVigo e os docentes da UCM Santiago Morilla, José Carlos Espinel e José Enrique Mateo.

Ler a noticia completa no DUVI

“Explorar como a incerteza se reflicte, se xestiona e se transforma desde os medios de comunicación”. Este é, como sinala a presidenta da Asociación Española de Investigación da Comunicación (AE-IC), Carmen Peñafiel, o propósito central do congreso internacional que reúne no campus de Pontevedra máis de 450 investigadoras e investigadores de 30 países. Promovido pola Facultade de Comunicación conxuntamente con esta asociación, o X Congreso Internacional da AE-IC celebra este martes a súa apertura, que se verá sucedida por tres xornadas de actividade na facultade, nas que se presentarán un total de 368 estudos, aos que se sumarán tres sesións plenarias que afondarán no papel de comunicación nun momento no que “as transformacións tecnolóxicas e a desinformación están afectando á percepción que temos da realidade”, recoñeceu Peñafiel.

Baixo o título de Comunicar na incerteza, este congreso celebra na tarde deste mércores na Casa Consistorial a súa acto inaugural, que se viu precedido por un encontro de representantes da organización na Casa das Campás, no que a presidenta da AE-IC, a decana, Emma Torres, e a vicerreitora do campus, Eva María Lantarón, afondaron na programación que ata este venres se desenvolverá na Facultade de Comunicación.

De carácter bienal, o congreso da AE-IC constitúe “o evento de investigación en comunicación máis importante do país”, salientou Torres, quen incidiu "na grande oportunidade para a Universidade e para o noso centro" que supón acolller por primeira vez este encontro académico. Nesa mesma liña, Lantarón destacaba que se trata dun evento que “marca un fito histórico para a nosa Universidade”, e que “consolida o Campus Crea como epicentro internacional da investigación” neste ámbito. O congreso conta con 460 inscritos e inscritas que participarán no evento de xeito presencial, ao que se suman aqueles e aquelas que presenten os seus traballos de forma virtual, opción que a organización abría a un máximo do 20% das comunicacións. No seu conxunto, estas ascenden a un total de 368, asinadas por 626 investigadores e investigadoras de 91 universidades, procedentes principalmente de diferentes países europeos e de América Latina, explicou Franquet.

Ler a noticia completa no DUVI

O uso do residuo na práctica artística contemporánea conecta as obras de oito artistas de diferentes xeracións, todos eles vinculados á Facultade de Belas Artes, na exposición que pechará a programación da Sala Universitaria Profesor Manuel Moldes neste curso 2025/2026. Baixo o título de A derruba, a mostra que se inaugurará este xoves 14, ás 20.00 horas “pretende establecer un diálogo entre diferentes perfís artísticos que representan a historia viva da Facultade de Belas Artes”,segundo sinala o seu comisario, o vicedecano da facultade e coordinador deste espazo expositivo, Ignacio Pérez-Jofre.

Promovida co apoio da Deputación de Pontevedra, a mostra colectiva que poderá visitarse ata o 26 de xuño na sala de exposicións do campus de Pontevedra reúne as creacións de Juan Fernando de Laiglesia, Natividad Bermejo, Román Corbato, Alejandro Fuertes, Julio Catalán, Sol Mussa, Cristina Rus e Yanina Sgro. “A mostra vincula o pasado e o presente de Belas Artes a través de propostas que incorporan o residuo na práctica artística”, sinala o texto de presentación desta mostra.  

Ler a noticia completa no DUVI

Como “unha inmersión no imaxinario e nos usos históricos das cavernas como espazos de memoria, refuxio e violencia” presentaban desde Play-Doc o filme Furada Negra, do artista e profesor da Facultade Belas Artes Berio Molina, recoñecido co premio da sección competitiva de Galicia na 22 edición deste Festival Internacional de Cinema de Tui. O xurado destes galardóns decidiu outorgar este premio ex aequo a Crías, de Xiana do Teixeiro, e á curtametraxe documental no que este artista e docente combina imaxes de arquivo de diferentes covas galegas coa “paisaxe sonora” destes espazos subterráneos.

“Moi contento, porque sempre é de agradecer que valoren o traballo que fas”, recoñecíase Molina despois de recibir este galardón na xornada de peche deste festival. A isto sumábase o “valor especial” de poder recoller este galardón nun acto no que estiveron presentes, lembra, integrantes do Clube Espeleolóxico Maúxo, responsables do traballo que serviu como punto de partida de Furada Negra. O filme premiado, explica Molina, emprega material de arquivo anterior ao ano 1970, que este club foi compilando cos anos e que deu lugar ao libro Tesouro Espeleolóxico Galego, editado por aCentral Folque, que reúne este conxunto de imaxes e documentos sobre covas, xunto con textos de Alba Cid. 

“O groso do libro é unha arquivo que ten a peculiaridade de que non hai unha xerarquía nas entradas”, sinala Molina dun traballo que compila un conxunto “moi amplo” de textos e imaxes “todas a un mesmo nivel”, o que facíao á súa vez “moi suxerente para facer a curta, porque abría moitas vías de entrada e moitas vías de descubrir cousas”. A súa vez, recoñece, tratábase dun arquivo ao que lle faltaba unha dimensión sonora, o que levou ao cineasta e docente a traballar, xunto con Xoán-Xil López, na “xeración dun arquivo sonoro” a través de gravacións no interior de covas como as do Folón. Deste xeito, explica, buscaba que a obra puidese reflectir tamén “a paisaxe sonora” destes espazos, caracterizada así mesmo por esa diversidade de entradas, “xa que nunhas escoitabas unha fervenza, noutras un regato, noutras unhas pingas...”,  apunta.

Ler a noticia completa no DUVI