#Noteaplatanes é o título do vídeo que converteu os estudantes da Facultade de Comunicación Estíbaliz Bárcena e Fernando David Bautista en finalistas de Efecto Mil, un concurso promovido pola Fundación Atresmedia, coa colaboración da Fundación Telefónica. Aberto á participación de mozos e mozas de entre 16 e 25 anos, trátase dun certame dirixido a fomentar nas novas xeracións un pensamento crítico sobre o uso das redes sociais, que contou na súa quinta edición con máis de 900 participantes. O certame convidaba a mozos e mozas a abordar diferentes riscos dixitais que afectan a súa contorna, a través de vídeos de curta duración, o que levou aos estudantes do Grao en Publicidade e Relacións Públicas a centrarse, explican, “no uso abusivo e a adicción ás redes sociais”.

Esta peza, realizada como traballo para a materia Produción publicitaria na web e multimedia, impartida polo profesor Alberto Dafonte, foi seleccionada como unha das 15 finalistas deste certame, o que permite ademais que Bárcena e Bautista participen nestas semanas nun programa formativo promovido por Atresmedia. “Ser elixidos entre centos de vídeos é unha oportunidade para dar visibilidade á nosa creatividade e pon en valor o noso talento e traballo”, salientan da súa selección nun concurso que viu incrementada nun 16% a súa participación respecto da edición anterior, na que outros dous traballos realizados na facultade alcanzaron o pase á final.

Ler a noticia completa no DUVI

Un martelo e un paraugas. Estes foron os dous obxectos que a organización da II Olimpíada da Creatividade entregou aos 14 equipos de estudantes de bacharelato e ESO, procedentes de sete institutos, que este xoves participaron nesta competición promovida polo Campus Crea. A partir destes dous elementos, ás e os participantes debían idear un obxecto cunha fisonomía, estrutura ou función innovadora, para lograr o pase á final dunha olimpíada que reuniu na Facultade de Comunicación 70 estudantes dos IES A Xunqueira I e Frei Martín Sarmiento, de Pontevedra; Mendiño, de Redondela; Ribeiras de Louro, de Porriño; Praia Barraña, de Boiro; e Adormideras, da Coruña, así como do colexio pontevedrés Sagrado Corazón.

Os dous grupos que representaban ao Praia Barraña e un equipo da Xunqueira I, Frei Martín Sarmiento e Ribeiras de Louro lograron o pase á final desta competición. Nela, debían dar continuidade a unha idea da fase previa, vinculándoa cun dos catro ámbitos do Campus Crea; educación, deseño, arte e comunicación.

Así o fixo o equipo do IES Xunqueira I, que se converteu no gañador desta II Olimpíada Crea grazas á súa proposta de orientar ao mundo da educación a idea do “paraugas para recoller froitas” co que trallabaron nesta fase final, converténdoo nunha ferramenta para as aulas de infantil. O segundo premio foi para un dos grupos do Praia Barraña, quen traballou cun “paraugas para axudar aos animais”, mentres que o terceiro clasificado foi o IES Ribeira de Louro, quen transformou nunha ferramenta docente a proposta dun “paraugas invernadoiro”. As e os integrantes destes tres equipos foron agasallados cunha cámara nunha entrega de premios na que participou a vicerreitora do campus, Eva María Lantarón, e na que foron recoñecidos cun diploma o equipo do IES Frei Martín Sarmiento e ao outro grupo finalista do Praia Barraña, como cuarto e quinto clasificados.  

Ler a noticia completa no DUVI

Impulsada polo Campus Crea coa finalidade de contribuír á divulgación de investigacións de carácter interdisciplinario, a innovación educativa e a intelixencia artificial constitúen os dous eixes centrais do quinto número do International Multidisciplinary Jorunal CREA (IMJC). Esta revista científica en formato electrónico, reúne neste volume sete artigos asinados por investigadores de cinco universidades españolas, que afondan en cuestións como o uso da intelixencia artificial xerativa na docencia, no desenvolvemento de proxectos de aprendizaxe-servizo ou nas limitacións do regulamento de intelixencia artificial da Unión Europea para limitar a “manipulación algorítmica”.

Nacida coa finalidade de conectar diversas disciplinas e de contribuír á divulgación científica desde unha perspectiva interdisciplinaria, IMJC, trátase dunha publicación de acceso aberto, incluída no portal de revistas do Servizo de Publicacións da UVigo e definida polo seu “horizonte multidisciplinar”, como destaca o seu editor xefe, o profesor do Departamento de Historia, Arte e Xeografía Luis Velasco. O seu propósito, sinala, é “ser un foco de recepción de propostas interdisciplinarias e transdisciplinarias sobre a idea da creatividade”, dentro do que, recoñece, están a gañar protagonismo “as propostas de artigos relacionados, sobre todo, coa creatividade centrada na innovación educativa”. Así se ve reflectido nos artigos seleccionados para o quinto número dunha publicación anual, no que varios dos estudos céntranse, desde diferentes perspectivas, nas aplicacións e implicacións da intelixencia artificial. Como recoñece Velasco, esta tecnoloxía constitúe un foco de análise “que nin sequera estaba no horizonte” cando se creou esta revista “e que agora, recoñece, constitúe un reto moi interesante para a propia noción de creatividade”.

Ler a noticia completa no DUVI

Abordar o estado no que se atopa o proceso de acreditación do Campus Crea, tras a sinatura dun protocolo coa Xunta de Galicia, foi o eixe central das xuntanzas dos seus comités consultivos académico e social-empresarial do proxecto de especialización desenvolvidas este luns. Integrados por persoal investigador de diferentes universidades e por responsables de diferentes institucións e entidades, as e os integrantes destes órganos de asesoramento abordaron nunhas xuntanzas, que combinaron o seguimento presencial e virtual, un acordo que contempla destinar preto de dous millóns de euros ao desenvolvemento dun plan de reforzo do Campus Crea no período 2026-2028 e no que se inserirán un conxunto de medidas orientadas a que o proxecto poida afrontar o proceso de acreditación como campus de especialización do Sistema Universitario de Galicia.

Como unha “moi boa nova, que nos vai permitir facer un traballo excelente durante estes dous anos”, presentou o reitor, Manuel Reigosa, o protocolo xeral de actuación asinado o 14 de abril co conselleiro de Educación, Ciencia, Universidades e FP, Román Rodríguez. Como explicou nunhas xuntanzas nas que estivo acompañado pola directora de área do Campus de Especialización Crea, Ana Belén Fernández Souto, este acordo implicará a posterior sinatura dun convenio que suporá unha achega de preto de dous millóns de euros os próximos dous anos, co obxectivo de que o campus de Pontevedra “poida avanzar na súa especialización”. 

En tres reunións na sede da Vicerreitoría do campus, este acordo foi abordado en primeiro termo co comité consultivo académico, que reúne especialistas das universidades de Santiago de Compostela, Complutense de Madrid, Autónoma de Barcelona, Nacional Autónoma de México, Sharkah (Emiratos Árabes Unidos) e Minho. Dirixidas tamén a reunir as “visións complementarias” das e dos seus membros, a segunda reunión foi co comité social-empresarial, integrado por responsables do Concello de Pontevedra, Deputación Provincial, Axencia Galega das Industrias Culturais (Agadic), Centro Galego de Arte Contemporánea (CGAC), Museo de Pontevedra, Rede de Museos Municipais de Vigo, Academia Galega do Audiovisual, Foro Empresa Pontevedra, Creatividade Galega, Clúster da Comunicación de Galicia e Asociación Profesional de Artistas de Galicia A Colectiva. Orientado o desenvolvemento dun plan de reforzo do Campus Crea, a través dun conxunto de medidas, centradas principalmente no eido de investigación, este protocolo foi tamén abordado nesta xornada co Consello Reitor do Campus Crea. 

Ler a noticia completa no DUVI