Conectar o alumnado da Facultade de Comunicación coa realidade do sector audiovisual é o obxectivo co que naceu a Máster Class Audiovisual Galego Augal, que entre este mes de novembro e marzo de 2024 achegará a este centro do campus pontevedrés directores como Ángel de la Cruz, Lucía Estévez e Quique Otero, produtoras como Beli Martínez e Silvia Fuentes e outra serie de profesionais da industria audiovisual. Patrocinada pola Axencia Galega das Industrias Culturais (Agadic), da Xunta de Galicia, a programación da décimo cuarta edición desta máster class abrangue a proxección de longametraxes como Honey Moon, La Parra ou o documental Filmei paxaros voando, sesións dedicadas a curtametraxes e series de televisión e actividades formativas. “Buscamos que o programa fose o máis variado posible”, salientou o profesor da Facultade de Comunicación e codirector de Augal Paulino Pérez, na presentación dunha edición que reúne “unha moi boa selección do mellor do audiovisual galego”, como engadiu o director da Agadic, Jacobo Sutil.
A decana da Facultade de Comunicación, Emma Torres, e o director da Área Adxunta á Vicerreitoría do campus de Pontevedra, Luis Torres, presentaron este martes, xunto a Pérez e Sutil, esta XIV Máster Class Audiovisual Galego, á que asistiron o codirector de Augal Miguel Anxo Fernández e o delegado territorial da Xunta en Pontevedra, Agustín Reguera. Aberta ao público, esta actividade comprende 27 horas de “formación complementaria de moi alta calidade”, que achega o alumnado “un reflexo do que é o sector audiovisual galego”, salientou Sutil. Non en van, trátase “dun programa transversal en canto a formatos e en canto a xéneros”, que achega os futuras e futuros profesionais “unha oportunidade única para que coñezan o funcionamento do sector”, engadiu o director da Agadic, mentres que Pérez destacou a presenza de profesionais formadas na propia facultade nunha actividade que busca tamén contribuír “á que a xente vexa cinema galego”.
No curso 2004/2005, a posta en marcha do título propio de Estudos Superiores en Deseño Téxtil e Moda de Galicia (Esdemga) supuña o inicio da formación en moda na Universidade de Vigo. Tres anos despois, os seus primeiros egresados e egresadas presentaban nun desfile as coleccións que realizaran como proxectos de fin de estudos. Nacía así Debut, un evento que na noite deste venres reuniu preto dun milleiro de persoas no Pazo da Cultura de Pontevedra, onde puideron contemplar sobre a pasarela as coleccións realizadas como traballos de fin de mestrado por 14 novos titulados e tituladas no Máster en Deseño e Dirección Creativa en Moda, que no curso 2017/2018 tomou o relevo do título propio. Nesta décimo oitava edición de Debut, o xurado decidiu outorgar o primeiro premio a Aquellos ojos, o proxecto no que Alba Vidal buscou recrear a través de tonalidades e texturas a atmosfera das películas de Wong Kar Wai.
Como un “recoñecemento ao traballo” recibía esta egresada o premio ao deseño e á creatividade, que outorga a Fundación Bimba y Lola, ao remate dunha pasarela na que presentou un proxecto que ten como punto de partida esa atmosfera creada polas “frías luces de neon da noite de Hong Kong” que este cineasta recrea nos seus filmes. “Inspírase no tratamento da cor e das texturas que utiliza e que levei o meu proxecto a través dunha experimentación material, tanto con téxtiles como con complementos”, salienta a gañadora de Debut 2024, quen destaca o valor dun galardón que mostran “que alguén lle deu un valor o teu traballo” e o valor engadido que pode achegar ao seu futuro profesional.
Máis aló do desfile no que se presentarán as 14 coleccións desenvolvidas como traballos finais no Máster en Deseño e Dirección Creativa en Moda, a programación de Debut está conformada por un conxunto de iniciativas “centradas na formación complementaria do alumnado e en facer visible o traballo do estudantado”, como sinala Lola Dopico, coordinadora deste mestrado da Facultade de Deseño. Con ese obxectivo, este luns daba inicio unha semana de actividades centradas no mundo da moda, na que se insiren unha decena de talleres e seminarios nos que participan máis de 120 alumnos e alumnas de grao e posgrao desta facultade. A estes sumaranse nos próximos días as conferencias da deseñadora de vestiario Binda Daileger e do xestor de proxectos de Loewe Enrique de Santiago, unhas xornadas profesionais para os novos titulados e tituladas e a exposición no Pazo da Cultura das coleccións que previamente protagonizarán o desfile que terá lugar na noite do venres 22.
Unha das novidades de Debut 2024, que conmemora os 20 anos de traxectoria dos estudos de moda na Universidade de Vigo, é a participación do alumnado dos dous cursos xa implantados do Grao en Deseño na preparación de elementos para a escenografía do desfile. Isto motiva que este programa formativo botase a andar xa en outubro co Obradoiro de Acción Gráfica, impartido polo artista plástico Eduardo Outeiro. “A idea é que Debut sexa unha semana para desenvolver todo este tipo de actividades e facelas extensivas a estudantes de todos os cursos”, subliña Dopico, que sinala que o obxectivo é que, coa posta en marcha de novos cursos, Debut se consolide “como unha cita importante dentro do calendario da facultade e, co tempo, poidamos ver medrar moitas cousas arredor desta cita”.
Na noite do venres 22 de novembro, 14 novos titulados e tituladas no mestrado en Deseño e Dirección Creativa en Moda presentarán no Pazo da Cultura as coleccións que desenvolveron como traballos de fin de máster (TFM) e coas que optarán aos premios que outorgan a Fundación Bimba y Lola e a Fundación Artesanía de Galicia. Este desfile será o acto central da décimo oitava edición de Debut, coa que este ano se conmemora o 20 aniversario da posta en marcha da formación en moda na Universidade de Vigo, que arrancou no curso 2004/2005 co título propio de Estudos Superiores en Deseño Téxtil e Moda de Galicia (Esdemga), substituído no curso 2017/2018 polo actual mestrado, adscrito á Facultade de Deseño. A formación será de feito un dos eixes centrais da programación que complementa este desfile e na que se insiren dez talleres e seminarios, dirixidos tanto ao alumnado do máster como do Grao en Deseño.
As conferencias da deseñadora de vestiario Bina Daigeler e do xestor de proxectos de Loewe Enrique de Santiago e unha xornada na que os novos titulados e titulados manteñen unha serie de entrevistas de traballo completan unha programación á que se incorpora, como novidade, a exhibición das coleccións no Pazo da Cultura nas dúas xornadas posteriores ao desfile. De aí que a coordinadora do mestrado, Lola Dopico, incidise en que se trata dun “programa moi poderoso, con moitísima formación”, na presentación de Debut 2024, un evento no que se implica “todo o profesorado e alumnado” da Facultade de Deseño e que “non sería posible sen o apoio” de Concello, Universidade e diferentes entidades públicas e privadas.
Dirixidas a dar coñecer os múltiples ámbitos de aplicación de diferentes titulacións e disciplinas científicas, existen olimpíadas científicas de química, bioloxía, xeoloxía ou informática, nas que compiten estudantes de diferentes niveis educativos. Non obstante, ata o de agora non existía ningunha iniciativa deste tipo que tivese como eixe central a creatividade, o que levou o proxecto de especialización Campus Crea a impulsar a I Olimpíada da Creatividade, aberta á participación de alumnado de bacharelato de toda Galicia, así como de ciclos formativos de artes plásticas e deseño. Ata o 20 de xaneiro permanece aberta a inscrición para participar nunha competición que se desenvolverá en marzo ou abril de 2025 e na que poderán competir un máximo de 20 equipos integrados por catro estudantes.
“Igual que son coñecidas as de física, química ou matemáticas, non hai ningunha olimpíada da creatividade”, sinala a directora de área do Campus de Especialización Crea, Ana Belén Fernández Souto, dunha proposta que busca “potenciar a creatividade desde os ámbitos artístico, comunicativo e educativo, que engloban as principais titulacións do Campus Crea”. Nese senso, o obxectivo desta olimpíada “é dar a coñecer o campus de especialización á sociedade en xeral, pero sobre todo aos estudantes de bacharelato, que son os futuros universitarios e universitarias”, a través dunha iniciativa que permitirá que “coñezan o campus e poidan entrar en contacto con docentes e estudantes das titulacións nas que poidan estar máis interesados”.
Aberta a un máximo de 80 estudantes
A inscrición na I Olimpíada da Creatividade Campus Crea deberán realizala os propios centros de ensino, que poderán presentar un máximo de dous grupos, integrados por catro estudantes, remitindo o formulario de solicitude de participación ao correo electrónico
Unha xornada de competición con dúas fases
A olimpíada desenvolverase en marzo ou abril de 2025 na Facultade de Comunicación, nunha xornada na que un máximo de 20 equipos competirán na primeira fase destas olimpíadas. Nela, segundo recollen as bases da competición, os diferentes grupos “recibirán un par de obxectos comúns e, ao combinalos, deberán propor un obxecto cunha fisionomía, estrutura e función novas e orixinais, ao que deberán dar unha función creativa”, tendo dúas horas para dar forma á proposta que logo exporán diante dun tribunal. Este seleccionará os cinco equipos finalistas que competirán na segunda fase, na que “recibirán, de xeito aleatorio, a proposta levada a cabo por outro grupo e terán que darlle continuidade ao proceso creativo, escollendo un eido concreto; educación, deseño, arte ou comunicación”. Neste caso, disporán dunha hora para preparar a proposta que presentarán ao xurado. Como lembra Fernández Souto, “a creatividade busca dar resposta a problemas e buscar solucións” e para iso é preciso “pensar dunha forma diferente, fusionar diferentes aspectos que aparentemente non teñen unha conexión”. De aí que o propósito desta proba é incentivalos a “aplicar ese pensamento ás titulacións máis vinculadas co campus de especialización”.
O tribunal encargarase de decidir os tres equipos gañadores, que serán premiados con agasallos como auriculares, cámaras ou altofalantes.
Preto dun centenar de investigadoras e investigadores de 17 universidades participan desde este luns, tanto de xeito presencial como virtual, no I Congreso Internacional de Creatividade, promovido polo Campus Crea no marco dos traballos para acadar a súa acreditación como campus de especialización. Promovido co patrocinio da Deputación de Pontevedra, no marco deste evento presentaranse 55 comunicacións que, desde unha perspectiva transdisciplinar, conectan a creatividade coa arte, o deseño, a comunicación e a educación, as catro áreas do Campus Crea. Complementado por unha serie de conferencias de académicos e profesionais, o congreso busca afondar “no poder transformador que ten a creatividade”, como sinalou Juan Manuel Corbacho, cordirector deste foro xunto ao tamén profesor da Facultade de Comunicación Jesús Pérez Seoane.
“Este primeiro congreso é un pulo para o proxecto de especialización dun campus con titulacións moi singulares”, sinalou a vicerreitora Eva María Lantarón, na inauguración deste foro, que se viu precedida por un minuto de silencio en memoria das vítimas da DINA no Levante. Lantarón recalcou tamén que o evento que este luns e martes se desenvolve tanto na Vicerreitoría do campus de Pontevedra como nas facultades de Deseño e Comunicación nace con vocación de continuidade, tras sinalar o “éxito” que supón contar nesta primeira edición “con máis de cen inscritos e inscritas e máis de 50 comunicacións”, presentadas por investigadores de 17 universidades de España e Portugal.
“A idea do taller era comezar na realidade e cambiar a realidade”, sinala Grzegorz Wnęk, profesor da Academia de Belas Artes de Cracovia, do obradoiro que impartiu esta semana no campus e que deu como resultado final o conxunto de obras que desde este venres poden verse na exposición Next to reality. Seis estudantes da Facultade de Belas Artes e dúas egresadas tomaron parte neste taller no que este artista e docente propuña crear cadros que tivesen como punto de partida a representación diferentes elementos da realidade cotiá, para logo transformala a través da incorporación de textos e novas imaxes.
Os resultados deste taller reúnense na exposición inaugurada nesta xornada na sala O Abrigo, da Facultade de Belas Artes, onde Wnęk impartiu o taller Next to reality, que tiña como obxectivo “desenvolver as posibilidades interpretativas e de imaxinación a través dun sistema multicapa, creando unha composición pictórica con diversas posibilidades de interpretación”. Con esa idea, o artista e docente reuniu un conxunto de elementos na propia sala, nunha sorte de bodegón no que tiñan cabida desde unha planta ata unha pantalla de ordenador. Mais o seu propósito non era que as e os participantes representasen esas pezas, senón empregalas como punto de partida para “irmos á seguinte realidade”. Con esa idea, as e os participantes debían pintar primeiro un fragmento desa realidade, para logo reinterpretala incorporando dous novos elementos; a introdución de texto na imaxe, que podía ser tanto un fragmento dunha obra literaria como unha creación propia; e unha nova imaxe pictórica, coa idea de establecer “novas conexións e posibles lecturas da obra”.
A propia natureza da performance como unha arte ligada un momento e un público concreto, que non deixa unha obra de carácter permanente, fai tamén que a investigación sobre esta disciplina poida xogar un papel clave no seu propio desenvolvemento. Coa idea de promover o estudo teórico desta disciplina, o grupo de investigación PE4 Imaxe e Contextos impulsaba hai preto dunha década Fugas e Interferencias, o único congreso académico centrado na performance de España. Coa participación de investigadores e investigadoras dunha decena de universidades de España, Portugal, Estados Unidos, Grecia e Reino Unido, a sede da Vicerreitoría do campus de Pontevedra e o Centro Galego de Arte Contemporánea (CGAC) acollerán entre o 31 de outubro e o 2 de novembro a novena edición deste congreso, que combinará a presentación de estudos con conferencias e performances.
Dirixido polos investigadores Carlos Tejo e Marta Pol, a IX International Performance Art Conference Fugas e Interferencias reunirá en Pontevedra e Santiago de Compostela investigadores, docentes, artistas, comisarios e xestores culturais, nun foro no que o número de participantes, “lonxe de decrecer, aumenta ou se mantén”, sinala Tejo. Xunto a representantes de seis universidades españolas, nesta edición participarán tamén investigadoras e investigadores das universidades de Nova York, Surrey e Ioánina e do Instituto Politécnico de Cávado e Ave de Barcelos. Nese senso, Pol pon de relevo que “o carácter internacional do congreso está presente desde o principio”, á vez que incide no obxectivo a futuro de “aumentar a presenza estatal” e poder afondar na "incipiente investigación nesta práctica e investigación artística".
No marco das actuacións do Campus de Especialización CREA, tentamos promover a cooperación entre diferentes grupos de investigación e fomentar a aparición de novas perspectivas de investigación que impliquen a grupos de distintos ámbitos.
A presente convocatoria ten por obxecto a organización dunha xornada de investigación dirixida a persoal investigador pre-doutoral que cumpra os requisitos sinalados no apartado 2, co obxectivo de contribuír ao intercambio de coñecemento e á mellora da actividade investigadora.
A xornada de investigación realizarase o día 6 de novembro de 2024 na Escola de Enxeñaría Forestal no Campus de Pontevedra. O desenvolvemento da actividade xirará entorno á presentación das liñas de investigación nas que traballan os doutorandos, para o que as persoas participantes disporán dun tempo determinado para realizar un short-talks.
Na semana seguinte, os pósters presentados permanecerán expostos na instalacións da Escola de Enxeñaría Forestal.
Requisitos para a participación na xornada de investigación
Poderán participar todas aquelas persoas que desenvolven actividade investigadora no Sistema Universitario Galego (SUG) sempre que cumpran os seguintes requisitos:
- Ser estudante de doutoramento con matrícula en programas de doutoramento que sexan afíns aos obxectivos do Campus CREA e que enmarquen a súa investigación nas áreas de creatividade e comunicación, creatividade e deseño, creatividade e belas artes, creatividade e educación.
- Formalización das solicitudes e prazo de presentación
O prazo de presentación das solicitudes permanecerá aberto ata o día 31 de outubro de 2024.
Os participantes deberán formalizar a súa inscrición na xornada escribindo ao correo electrónico:
Unha vez aceptada a inscrición na xornada, as persoas participantes recibirán indicacións para proceder á impresión dos paneis. O custe da impresión dos pósters realizados polo persoal investigador que participe será asumido pola organización.
Todos os participantes recibirán un diploma de asistencia emitido pola Universidade de Vigo.
Para máis información:
Secretaría técnica do Campus de Especialización CREA
986 802 087